Nasapwan nga patay ang isa ka Philippine eagle samtang yara sa dagat nga sakop sang Ponson Island sa Pilar, Cebu.
Sandig sa report sang Philippine Eagle Foundation (PEF), ini nga lalaki nga agila nga kilala nga si “Uswag” ang posible napatay bangud sa pagkalumos.
Hulyo 31 sang naglunsar ang otoridad sang search and recovery operation matapos nakit-an sa GPS readings sa amo nga adlaw nga yara sa dagat si Uswag. Tatlo ka adlaw pa ang nagligad sang nasapwan ang lawas sang tatlo ka tuig nga agila nga nagalutaw-lutaw sa dagat nga may debris pa sang seagrass kag lumot.
Base sa pagpangusisa sang veterinarians, posible nga apat ukon lima ka adlaw na nga napatay si Uswag antes nakuha ang iya lawas sa dagat.
“Sadly, perhaps because of the rains and winds brought about by the Southwest monsoon, eagle Uswag lost his flight bearings and got sucked in towards the sea,” suno sa PEF.
Base sa X-ray plate, intact kag wala sang senyales sang fracture ukon trauma ang tanan nga tul-an sang agila kag wala man sang bala ukon air gun pellets sa iya lawas.
Nahibaluan nga isa si Uswag sa duha ka Philippine Eagles nga ginbuy-an sa Leyte sang Hunyo 28 sa idalom sang Species Reintroduction Project sang Department of Environment kag PEF.
Base pa sa report sang PEF, ini na ang ika-siyam nga dokumentado nga kaso nga naaksidente ang Philippine eagle sa dagat, apang pito sa ila ang nakaluwas.
Tuman ang pagpabalor sa agila sa Pilipinas bangud ginakabig ini nga critically endangered sang International Union for Conservation of Nature kun sa diin ginabanta 400 pairs na lamang ang nabilin sa kagulangan.
