ILOILO CITY – Gin-athag sang duha ka Ilonggo nga estudyante nga istrikto ang Philippine National Police Academy (PNPA) kag ang counterschool sini nga Philippine Military Academy (PMA) sa implementasyon sang Anti-Hazing Law.
Sa interview sang Bombo Radyo kay Cadet Second Class Michael Jan Villa, tumandok sang Nueva Valencia, Guimaras, iya ginpahayag nga wala sang dapat kangahaw-an ang publiko sa mga nagaguwa nga istorya nga ginapahanugutan kag ginatolerar ang hazing sa amo nga mga eskwelahan.
Dugang ni Villa, sila sang iya upod nga si Cadette First Class Rina Cionie Legayada Leal, tumandok sang Lambunao, Iloilo ang makapamatuod nga tuman ka istrikto ang PNPA sa ila pagsulundan nga wala sang bayolente nga pagpangastigo.
Ang kontrobersyal nga kaso sang hazing sa PMA suno sa iya ang ginakabig nila “isolated” gid lamang.
Iya pa ginpahayag nga mas maayo kon kabigon hangkat sang mga ginikanan ang pagpadala sa ila mga anak sa amo nga eskwelahan para sa nagakaigu nga training.
Ini man ang bugalon nga ginpahayag ni Villa bilang pag-promote sang iya ginhalinan nga buluthuan.
Nahibaluan nga si Villa ang tatlo na ka tuig nga yara sa PNPA, kag ang iya amay nga isa man ka police commission officer ang isa sa iya ginakabig haligi sang iya handum nga magserbsiyo sa tawo.
“NO GENDER DISCRIMINATION.”
Samtang, ginpakigbahin naman ni Cadette First Class Rina Cionie Legayada Leal, tumandok sang Lambunao, Iloilo, nga masarangan sang mga babayi ang training sa PNPA.
Suno kay Leal, bilang isa ka babayi kag graduating student, pila ka beses niya napamatud-an nga masarangan sang babayi ang masarangan man sang lalaki sa ila eskwelahan.
Aminado si Leal nga nangin tuman ka budlay ang iya sitwasyon sa una nga tuig sa academy bangud halin siya sa isa ka civilian nga pamilya.
Apang, dugang ni Leal, pinaagi sa pagpangabudlay kag masami nga training, wala sang “gender” nga ginapaboran sa ila propesyon.
BUKAS SA PUBLIKO.
Kaangot diri, mainit nga ginaimbita sang PNPA ang mga Ilonggo nga mangin kabahin sang ila akademya.
Suno kay Cadet Second Class Michael Jan Villa, ang graduates sang PNPA kag PMA ang pwede nga mangin kabahin sang Philippine National Police (PNP), Bureau of Fire Protection (BFP), kag Bureau of Jail Management and Penology (BJMP).
Dugang ni Villa, pwede man sila makabulig sa ila pamilya samtang nagaeskwela bangud makabaton sila sang P43,000 kada bulan.
Magluwas pa nga isa ini ka kahigayunan nga makaserbisyo sa publiko, suno kay Villa, maayo man sa balatyagon bangud maayo ang pagbaton sa ila sang mga pulis kag awtoridad kon diin sila magkadto.
Ini ang ila napamatud-an sang sila ang ang nagpadulong sa Police Regional Office 6 (PRO) kag sa BFP subong nga semana.
Ginpanawagan ni Villa sa mga interesado nga aplikante nga magabaton pa sila sang walk-in applicants bwas, Nobyembre 9, sa Iloilo National High School.
Ang exam ang natalana sa Domingo, Nobyembre 10, sa nasambit nga eskwelahan, kag ini ang bukas sa 18-23 anyos, highschool graduate man ukon Senior High School students (sa kondisyon nga magalab-ot ang edad sa 18 anyos sa June 2020).
Kinahanglan suno sa iya nga isekyar lang ang mga requirements: aunthenticated birth certificate, fully accomplished application form, 2×2 ID picture in white background, name tag, kag medical certificate nga pirmado sang physician.
Pahayag sang natungdan, indi na kinahanglan magkuha sang exam ang mga may latin honors sa ila pag-graduate, sa kondisyon nga magakadto gihapon sila sa Domingo kag magadala sang certification bilang ebidensya.
