Ginkumpirma sang Department of Foreign Affairs (DFA) nga ginkanselar na sini ang Philippine passport ni dismissed Bamban, Tarlac Mayor Alice Guo.
Suno sa ahensya, ang ila tikang ang kasunod sang certification nga ginhatag sang Department of Justice (DOJ) nga halin sa National Bureau of Investigation (NBI) kun sa diin ginpakita nga ang biometrics ni Guo ang nagasanto kay Guo Hua Ping nga isa ka Chinese national.
Septyembre 30 pa suno sa ahensya sang nangin epektibo ang kanselasyon sang passport sang dismissed mayor.
Base sa New Philippine Passport Law, mahimo ma-deny, ma-cancel, ukon ma-impose ang anuman nga restrictions sa passport kun ginpeke ini, gin-tamper, ukon sala ang pag-isyu kag iban pa gid nga grounds.
“The DFA is committed to upholding the security and integrity of issuing Philippine passports and assures the public that fraudulent application and acquisition of passports are referred to law enforcement agencies for investigation and prosecution,” suno sa DFA paagi sa ila spokesperson nga si Teresita Daza.
Dugang sang ahensya: “The DFA enforces Zero Tolerance Policy for unscrupulous individuals circumventing the Philippine passport application and issuance procedures.”
Preso subong si Guo sa Pasig City Jail kag nagapangatubang sang sampaw-sampaw nga mga kaso.
Nangin subject siya sang binulan nga imbestigasyon sa iya kaangtanan sa iligal nga Philippine Offshore Gambling Operator (POGO) sa Bamban nga malapit lang gid sa munisipyo sang banwa.
Ini nga POGO hub ang naangot sa mga krimen kaangay sang pagpang-scam kag pagpang-abuso sa ila nga mga tinawo.
Paagi naman sa imbestigasyon sa Senado sa pagpanguna ni Senator Risa Hontiveros, amat-amat nga nahublasan ang pagkatawo ni Guo nga isa ka Chinese national kag subong nagalutaw liwat ang alegasyon nga isa ini ka Chinese spy apang iya man ini nga ginpanginwala.
