Nagsarurot na naman sa panibag-o nga record low ang baylo sang Philippine peso kontra sa US dollar kasunod sang nagasingki nga tensyon sa Middle East.
Sandig sa Bankers Association of the Philippines, nagtakop ang trading kahapon nga P59.50 sa kada isa ka US dollar ang baylo sang Philippine currency.
Mas maluya pa ini nga balor ipaanggid sa nauna nga record low nga P59.46 nga na-rekord sang Enero 15.
Antes ang pag-inaway sang US, Israel, kag Iran nga naglapta sa Middle East, naka-bangon-bangon sang gamay ang peso nga yara sa P57.51 as of Feb. 25.
Kun maluya ang baylo sang Philippine Peso, buot silingon, mas mahal ang pagbakal sang imported goods, lakip na ang langis bangud ini nga produkto ang gina-purchase paagi sa dolyar.
Magluwas diri, bangud man sang pagluya sang peso, may impact man ini sa utang sang Pilipinas, ilabi na nga one-third sang amo nga utang ang naghalin sa foreign creditors ukon mga manugpautang halin sa luwas sang pungsod.
Una na nga ginsiling ni President Ferdinand Marcos Jr nga indi sini luyag nga makalapaw ang peso sa 60 pesos sa kada isa ka dolyar, bangud kun magluya ang balor sang Peso, pat-od nga magatimbuok na naman ang balayran sa utang.
