ILOILO CITY – Ginpasidunggan sang International Banknote Society bilang “Banknote of the Year” sa tuig 2022 ang 1000-Piso polymer ukon “plastic” banknote sang Pilipinas.
Suno sa Bangko Sentral ng Pilipinas, ginpyerde sang Philippine banknote ang iban pa nga mga finalists nagikan sa Algeria, Barbados, Egypt, Northern Ireland, kag Scotland.
Ini ang una nga Philippine banknote nga nagdaog sang award.
Ang International Banknote Society ang isa ka global non-profit organization nga nagakilala sa dalayawon nga banknotes nga gin-isyu sa tagsa ka tuig nga nagabase sa artistic merits kaangay sang design kag paggamit sang color kag ang high-quality security features.
Gina-feature sa 1000-Piso polymer banknote ang Philippine Eagle nga nagasimbolo sang pagkapinasahi sang mga Filipino, ang kakusog, ang gahum, pagpalangga sa kahilwayan kag ang kasipat sang mata.
Makita man diri ang sampaguita nga amo ang national flower nga naga-represent sang purity, simplicity, humility, kag strength.
Yara man ang Tubbataha Reefs Natural Park, nga isa ka UNESCO World Heritage Site kag ang T’nalak weave design sang T’boli people; kag ang South Sea Pearl.
