ILOILO – Magapatigayon sang Polymerase Chain Reaction test ang Philippine Red Cross para sa mga na stranded nga Overseas Filipino Workers sa Metro Manila.
Sa ginpatigayon nga pagsinapol sang Regional Inter-Agency Task Force, ginpahayag ni Gilbert Paul Valderrama, administrator sang Philippine Red Cross Iloilo, nga maga-akomodar sang 150 nga Overseas Filipino Workers ang independent kag autonomous non-government organization.
Suno kay Valderrama, ang mga nakatapos na sa quarantine kag nagnegatibo sa COVID-19 test ang mahimo na makapauli sa Iloilo kag magapaidalom sa liwat sa quarantine kag COVID-19 test antes makapauli sa ila tagsa ka balay.
Ginpahayag ni Valderrama nga magapadayon ang coordination sang Philippine Red Cross sa concerned agencies para nga matigayon ang pagpapauli sa mga Overseas Filipino Workers.
Ginduso naman ni Dr. Mary Jane Juanico, pinuno sang Infectious Disease Section sang Department of Health 6, nga ipahamtang sa isa ka pasilidad ang tagsa ka batch sang Overseas Filipino Workers nga natalana nga ipaidalom sa COVID-19 test.
Katuyuan sini suno kay Juanico amo nga indi masimpunan sang lain ang batch sang Overseas Filipino Workers nga natalana nga magapauli.
