ILOILO – 60 ka mga folding bed ang igadonar sang Philippine Red Cross sa Iloilo Provincial Government.
Sa interview sangBombo Radyo kay Gilbert Paul Valderrama, Chapter Administrator sang Philippine Red Cross-Iloilo, iya ginpahayag nga madamu subong ang mga pasyente nga na-admit sa tagsa ka district hospital sa probinsya sang Iloilo bangud man sa pagduging sang Dengue.
Suno kay Valderrama, sila mismo nga mga empleyado sang Philippine Red Cross ang nag-amutay sa pagbakal sang folding beds.
Ini agud nga mapadasig ang procurement process kag agud nga mahatag na ini sa masunod nga semana.
Nakadepende naman sa kadamuon sang mga naka-admit nga pasyente sa tagsa ka district hospital ang numero sang igahatag nga folding bed.
Santo sa record sang Iloilo Provincial Government, naglab-ot na sa 342 ka mga pasyente ang na-admit sa mga district hospital bangud sa Dengue sa diin ang iban sa mga pasyente ang nagadala na lang sang kaugalingon nga mahigdaan.
Samtang, ginakalipay naman sang Provincial Health Office ang pagdonar sang Philippine Red Cross sang 60 ka mga folding beds para sa mga district hospital sa probinsya sang Iloilo.
Sa interview sang Bombo Radyo kay Dr. Ma. Socorro Quiñon, pinuno sang Provincial Health Office, iya ginpahayag nga daku nga bulig ang paghatag sang Philippine Red Cross sang folding bed.
Suno kay Quiñon, ang iban sa mga pasyente ang nagadala na lang sang kaugalingon nga folding bed agud lamang nga ma-admit sa hospital.
Sa pinaka-ulihi nga datus sang Provincial Health Office, ginpahayag ni Quiñon nga naglab-ot na sa 19 ang patay bangud sa Dengue.
