Nagpanugyan ang Philippine Red Cross sa publiko ilabi na sa mga luyag magdonar sang dugo nga tuman ka kinahanglanon sa tunga sang nagapadayon nga pandemya.
Sa interview sang Bombo Radyo kay Dr. Carlo Nolan Carado, Medical Officer sang Philippine Red Cross-Iloilo Chapter, iya ginpahayag nga ang mga pumuluyo nga naga-edad 18 tubtob 60 anyos ang makabig nga eligible nga makadonar sang dugo.
Nagakadapat man suno sa natungdan nga may ”atleast 6 to 8 hours” sang tulog ang isa ka indibidwal antes ang blood donation.
Dugang pa nga abiso sang doktor, antes ang pagpakigbahin sa bloodletting activity, likawan ang pag-inom sang makahulubog nga ilimnon, kag pagkaon sang mga mantika-on.
Para naman sa mga bag-o lang nagpa-tattoo, hulaton anay ang isa ka-tuig antes magdonar sang dugo.
Sa mga luyag naman madonar sang dugo sa Iloilo City, may yara sang walk in sa Philippine Red Cross Iloilo Chapter sa Bonifacio Drive, Iloilo City Proper.
