Indi apektado ang surfer nga si Philmar Alipayo sa isyu nga ginakaulamiran sini matapos naglapta ang TikTok video nila sang isa ka influencer sa Siargao.
Sa iya pinakaulihi nga Instagram story, nag-share si Philmar sang ila couple pictures sang iya fiance nga si Andi Eigenmann.
Caption sini sa ila nga selfie: “National Couple Day! Post your other half [heart emoji]”. Sa ikaduha nga picture, updanay sila ni Andi kag anak nga si Lilo. Nakabutang man ang lokasyon nga yara sa resort sa La Union; buot silingon, break anay sa ila puluy-an sa Siargao.
Matandaan nga sang nagligad lang nga adlaw sang naglapta ang video sang influencer/video creator nga si Crissa Liaging nga naga-istorya kay Philmar sa Siargao.
Naka-topless pa si Philmar kag halos wala na sang distansya sa isa kag isa.
Million ang views sini pero gin-delete kag gin-reupload ni Crissa nga may amo gihapon nga video kag ginbutangan pa sang background music nga “Weak” sang American R&B vocal trio nga SWV.
Una naman nga nagdepensa ang influencer nga wala ini naga-flirt kay Philmar bangud nakahibalo siya nga pamilyado ini, apang wala ini ginpalampuwas sang netizens ilabi na ang nagaapin kay Andi.
Sa bahin ni Andi, nagpaguwa man ini sang statement nga naga-address sa hitabo: “What’s shameful is purposely posting and editing a video to cause a stir, disturbing the peace of people and dragging them into their negativity, just for some social media attention.”
