Hugot nga ginabalabagan sang Philippine Rural Electric Cooperatives Association Incorporated (Philreca) ang Memorandum 2021-055 sang National Electrification Administration (NEA) nga nagatuyo nga kuhaon ang kinamatarong sang electric cooperatives (ECs) sa pag-hire ukon pagpili sang ila general managers.
Ang Philreca amo ang asosasyon sang 121 ka electric cooperatives sa bilog nga pungsod.
Sa interview sang Bombo Radyo kay Atty. Janeene Colingan, executive director kag general manager sang Philreca, iya ginpahayag nga wala man lang sang konsultasyon nga ginpatigayon ang NEA sa mga electric cooperatives antes magpaggwa sang bag-o nga memoranda.
Suno kay Colingan, nahangpan nila nga may poder ang NEA sa pag-supervise sa mga kooperatiba, apang sa ginahimo sang ahensya, kasubong nga kontrol na ang nagapangibabaw kag wala na sang tingog ang electric cooperatives.
Pahayag ni Colingan, nasaad man sa bag-o nga memoranda sang NEA ang pagdula sang tanan nga requirements sa pag-hire sang isa ka competent nga general manager, kasubong sang 5 years para sa supervisory experience, educational background sa mga kurso kaangay sang Engineering, Business Administration/Finance Management, Accountancy, Behavioral Science, kag proven track record sa effective management sang successful electric utility-related business enterprise.
Maathag ini suno sa iya nga pagpanubo sang standards sa i-hire nga general manager nga amo ang maga-lead ukon magapamuno sa mga kooperatiba.
Nagpanawagan man ang natungdan sa Board of Administrators sang NEA, ilabi na kay Administrator Emmanuel Juaneza, nga untaton na ang pagyaguta sa laye kag pag-inflict sang inhustisya sa electric cooperatives.
