Gintapos na sang International Tennis Federation (ITF) ang suspension sini nga ginpapanaog batok sa Philippine Tennis Association (PHILTA).
Gin-anunsyo sang Philippine Olympic Committee (POC) ini nga development pagkatapos sang tatlo ka tuig man nga ban sa tennis body.
Ginakabig man ini nga importante nga development sa patag sang tennis sa Pilipinas ilabi na bangud bukas na ang puertahan agud nga makabalik ang nasyon sa active international competition kag matugutan naman ang asosasyon nga maumpisahan ang development program.
Nagpasalig man ang international body nga magahatag ini sang assistance sa PHILTA kun kinahanglan sini ang bulig sa pag-promote sang amo nga sports.
2020 sang ginsuspinde ang PHILTA bangud sa power struggle sa leadership nga nakalab-ot sa atensyon sang International Tennis Federation .
Kadungan sang suspensyon, ginmanduan man anay ang officers nga iga-revamp ang ila nga by-laws para nga matugutan man ang pagpasakop sang tanan nga stakeholders sa patas kag transparent nga eleksyon.
