Ginkumpirma sang Philippine Institute of Volcanology and Seismology (PHIVOLCS) nga nag-resulta na naman sa pag-ilig sang lahar sa southern kag western slopes sang Bulkan Kanlaon ang thunderstorms sa Negros Island kahapon, Hunyo 7.
Base sa seismic record sang ahensya, natabo ini dies minutos antes ang alas tres kahapon sang hapon kag naglawig sang isa ka oras kag 20 minutos.
Sa rekord sang All-Weather Station sang Manghumay, Mailum, Bago City Observation Station, masobra tatlo ka oras ang pag-ulan.
Sa advisory pa sang ahensya, ginsulit nga dapat mag-aligmat ang mga komunidad malapit sa mga suba sa ubos sang bulkan bangud posible matabo ang kaangay nga pag-ilig sang lahar kun nagasige ang pag-ulan.
Sa nauna nga advisory, nagpahanumdom man ang talatapan sa mga pumuluyo nga likawan ang pag-inom sang tubig nga halin sa areas nga malapit sa bulkan.
Wala sang pagbag-o sa alert level status, may na-rekord nga at least 14 volcanic earthquakes kahapon, kag ginapaaligmat ang publiko kag gina-abisuhan nga maghimo sang precautionary measures pananglitan ipasaka ang status sa Level 3.
(Screenshot from: La Castellana Ride Life/FB)
