ILOILO CITY – Naobserbahan sang Philippine Institute of Volcanology and Seismology (PHIVOCS) nga may yara sang increase sang sesmic activity sa Bulusan volcano sa probinsya sang Sorsogon.
Sa ginpagwa nga advisory kagab-i, at least 45 ka volcanic earthquakes lakip na ang duha ka low-frequency volcanic tremors nga na-record sa Bulusan Volcano Network.
Suno sa ahensya, kalabanan sang paghulag sa bulkan ang mahina lamang apang may pamahog sang phreatic eruption sa masunod nga mga inoras.
Nagapabilin sa gihapon ang Alert Level 1 status sa Bulusan volcano, buot silingon, indi normal ang kondisyon sini.
Sang Dominggo, Hunyo 5, nagluntad ang phreatic eruption nga nagpwersa sa 100 ka mga pamilya nga magbiya sa ila mga panimalay nga malapit sa bulkan.
Ang iban sa ila, ang nakabalik na sa ila mga panimalay.
Nagpahanumdom ang PHIVOLCS sa publiko kag sa local government units (LGU) nga indi magsulod sa four-kilometer radius nga ginakabig nga Permanent Danger Zone kag dapat nga mangin alerto man ang yara sa Extended Danger Zone sa posible pagluntad sang hinali nga phreatic eruptions.
