𝗕𝗔𝗧𝗔𝗡𝗚𝗔𝗦 — Nakarekord ang Philippine Institute of Volcanology and Seismology (PHIVOLCS) sang dugang nga aktibidad sa Taal Volcano sa Batangas matapos nga naobserbahan ang tatlo ka phreatic ukon steam-driven eruptions sang Byernes sang gab-i.
Ini ang natabo isa ka adlaw pagkatapos nga ginreport sang Philippine Institute of Volcanology and Seismology ang isa ka phreatic eruption sa Taal.
Suno sa ahensya ang tatlo ka bag-o nga mga hitabo sa phreatic naglawig sang isa ka minuto kada isa, nga narekord sang 7:15 p.m., 7:19 p.m. kag 7:23 p.m.
Narekord man ang tatlo ka linog halin sa bulkan.
Nagpaguwa man ang Taal Volcano sang 3,309 ka tonelada sang sulfur dioxide nga nagtuga sing vog, ukon aso sang bulkan. Ang iya plume nagtaas sang 2,100 metros, nga naanod pakadto sa bagatnan-sidlangan.
Nakit-an man sang Philippine Institute of Volcanology and Seismology bulletin ang long-term deflation sang Taal caldera, kag ang short-term inflation sang pangkabilugan sang naaminhan kag bagatnan-sidlangan sa mga kilid sang Taal Volcano Island.
Nagapabilin naman sa alert level 1 ang Bulkan Taal, nga nagapatimaan sang manubo nga lebel sang paglupok.
Apang, ang posible nga mga katalagman sa idalom sang Alert level 1 amo ang mga paglupok ukon phreatic, mga linog gikan sa bulkan, gamay nga pagtupa sang abo kag makamamatay nga mga pagtipon ukon pagpaguwa sang gas gikan sa bulkan.
Nagapabilin nga hugot nga ginadumilian ang pagsulod sa Taal Volcano Island, ilabi na sa mayor nga crater kag Daang Kastila fissures.
Ang isla ginkilala nga isa ka permanente nga ‘danger zone’,kon sa diin, ang pagtener sa Taal Lake ginadumilian man.
Nagpaandam man ang Philippine Institute of Volcanology and Seismology sa mga eroplano nga nagalupad malapit sa bulkan ang delikado sa abo sa kahawaan kag airborne ash and ballistic fragments nga halin sa Taal volcano.
