Nagsaka na sa 299 ang na-rekord nga mga aftershock kasunod sang magnitude 7.4 nga linog sa Davao Oriental.
Base ini sa 4 p.m. data nga gin-release sang Philippine Institute of Volcanology and Seismology (Phivolcs) subong nga adlaw, Oktubre 10.
Suno sa ahensya, na-rekord ang aftershocks sa masobra 40 ka mga barangay kag nagabaskog halin sa 1.3 tubtub sa 5.8 magnitude.
Suno kay Phivolcs Director Teresito Bacolcol, mahimo maglab-ot sa magnitude 6.4 ang pinakamabaskog nga aftershock.
Ginalantaw nga magalawig man sang pila ka semana ang pagtay-og nga mabatyagan sang mga taga-Davao.
Gin-anunsyo man sang Phivolcs nga ang rason sang linog amo ang Philippine Trench nga isa sa anum ka mga trench diri sa pungsod.
Una gin-report sang Phivolcs nga magnitude 7.6 ang kabaskugon sini, gin-downgrade sa 7.5, kag sunod nga gin-revise liwat sa 7.4 magnitude. Sa Iloilo City, Intensity III ang nabatyagan.
Gin-isyu naman ang tsunami warning 11:43 kaina sang aga para sa Davao Oriental, Dinagat Islands, Surigao del Norte, Surigao del Sur, Eastern Samar, Southern Leyte, kag Leyte. Ginbawi man sang ahensya ang warning 1:43 subong nga hapon.#
