Na-rekord sang Philippine Institute of Volcanology and Seismology (Phivolcs) ang pinakamataas nga pagguwa sang volcanic gas sa Bulkan Kanlaon halin sang ginsuguran sang ahensya ang instrumental gas monitoring.
Sa advisory sang Phivolcs, ginpahayag nga ang volcanic sulfur dioxide (SO2) gas nga nagguwa sang Byernes ang nag-average sang 5,397 tonnes kada adlaw. Halos doble ini sa 3,175 tonnes per day average nga na-rekord halin sang naglupok ang bulkan sang Hunyo 3.
“Kanlaon has been degassing increased concentrations of volcanic SO2 this year at an average rate of 1,897 tonnes/day,” suno sa advisory.
Pahayag pa sang ahensya, ang dugang nga gas emission kag wala-untat nga volcanic activity ang posible maangot sa magmatic processes nga amo man ang naga-resulta sa indi gihapon pagkalma sang bulkan.
Wala pa sa gihapon ginbawi ang ginbatak nga status nga Alert Level 2 nga buot silingon, posible pa matabo ang explosive eruption ukon hazardous magmatic eruption sa baba sini rason nga dapat indi anay magsulod ang mga tawo sa four-kilometer-radius Permanent Danger Zone (PDZ).
Ginapaandaman man ang publiko sa risgo nga matuga sang ashfall kag ang pag-ilig sang lahar.
