ILOILO CITY – Nagpaindis-indis sa national costume competition ang 79 ka mga candidates sang Miss Grand International 2017 sa Sun Spa Resort Quang Binh, Vietnam.
Isa-isa nga ginrampa sang mga beauty queens ang ila costume nga nagapakita sang kultura sang ila tagsa-tagsa ka pungsod.
Pila sa mga candidates ang nagpa-wow sa mga audience kag judges bangud standout sa ila national costume, ilabi na ang obra sang mga Pinoy designer.
Kalakip na diri ang pambato sang Pilipinas nga si Elizabeth Clenci nga sulod sa Top 10 sang mga standout sa national costume, sang mga pageant experts.
Suksok ni Clenci ang T’boli inspired gown nga himo sang designer nga si Jear Sond Dimavivas.
Suno kay Dimavivas, ang ginhimo niya nga gown para kay Clenci ang representasyon sang isa ka moderno nga T’boli princess kag nagapakita sang kultura sang tribu nga T’boli.
Bitbit sang Pinay beauty queen sang ini ang nagrampa, ang gitara sang mga T’boli nga kun tawgon Hegulung.
Samtang isa man sa mga ginpalakpakan ang national costume si Miss US Virgin Islands Brianna Marie Key nga himo sang Ilongga fashion designer nga si Kirsten Regalado.
Daw kaangay nga peacock ang beauty queen sa higante sini nga pakpak nga may fuschia feathers kag ginternuhan sang headdress.
Una na ginpahayag ni Regalado sa interview sang Bombo Radyo Iloilo nga inspirasyon niya sa paghimo sang costume ni Key, ang mga pispis sang US Virgin Islands.