ILOILO CITY — Nagpa-athag ang photographer sang controversial nga nude photoshoot sa ginabansagan nga ‘Baguio of Iloilo’ sa Bucari, Leon.
Ginpahayag ni Edward sa exclusive interview sang Bombo Radyo, nga indi hublas ang ila nga modelo nga babaye sang ginpatigayon ang photo shoot bangud may tape ukon plaster ang sensitibo nga bahin sang lawas sini.
Kabahin lamang ini suno sa iya sang ‘art’ kag indi para bastuson ang lugar ukon mga pumuluyo.
Ginpaathag sini, nga masami sila naga-photoshoot kon may mga okasyon kasubong sang Valentine’s Day gani nga nahuman ang concept sang hublas nga babaye nga nagapamati sang music bangud wala sang ka-date.
Ini ang pagagamiton naman sang grupo sang mga photographers sa kun sin-o man ang interesado nga magbakal sang ila nga kuha, ilabi na ang mga magazine sa luwas sang pungsod.
Subongpaman, gin-ako ni Edward ang ila kapaltahan bangud wala na nila napanumduman ang balatyagon sang iban nga mahimo masakitan sa ila obra maestra.
Paagi sa Bombo Radyo, nag-public apology si Edward sang madamo nga beses sa modelo kag pamilya sini; sa mga pumuluyo kag Local Government Unit sang Leon nga na-offend sa amo nga pictorial.
Magluwas sini suno sa photographer, magapakigkita pa gid sila kay Leon Mayor Rolito Cajilig kag Cong. Arcadio Gorriceta agud personal nga magpangayo sang pasaylo.