ILOILO CITY – Ginalantaw nga pinakadako nga paglapas sa health protocol sang pumuluyo amo ang physical distancing.
Sa interview sang Bombo Radyo kay Jeck Conlu, spokesperson sang COVID-19 Team sang Iloilo City Government, iya ginpahayag nga madamo sang vehicular traffic kag pagdugok sang pumuluyo sa pila ka bahin sang syudad sang Iloilo.
Suno kay Conlu, daw kaangay nga dako ang kumpyansa sang mga tawo nga maggwa, magkadto kag magbakal sang mga kinahanglanon sa syudad.
Bangud sini, ginpahayag ni Conlu nga padayon sa paglibot ang Compliance Team sang COVID-19 agud makadtuan ang mga lugar nga gindugukan sang pumuluyo.
Suno sa natungdan, nagpahanumdum man ang ila nga Team sa mga establisyimento komersyal agud hugot nga ipatuman ang mga minimum health protocol.
Nagpaandam man si Conlu nga maga-issue ang Compliance Team sang ticket sa mga health protocol violators.
