Ginkilala si Miss Universe 2015 Pia Wurtzbach bilang isa sa mga celebrities nga may mataas nga media value sa bag-o lamang nagtakop nga Milan Fashion Week.
Sa report sang influencer marketing platform nga Lefty, nagapang-anum si Pia sa “most visible influencers” sa amo nga prestihiyoso nga Fashion Week sa Italya.
Ini nga event ang ginadugukan sang designers agud nga ipakita ang ila bag-o nga mga desinyo kag sunod nga mga koleksyon. Isa ini sa ginabansagan “Big Five” global fashion weeks kaupod sa New York, Paris, London, kag Tokyo.
Kun lantawon ang gin-release nga statistics, nakatipon ang Filipino beauty queen sang $2.95M ukon P165.3-million sa media value paagi sa pagtambong sa runway shows sang dalagku nga brands kaangay sang Gucci, Tod’s, Bally, Onitsuka Tiger, Missoni, Max Mara, Fendi, kag iban pa.
Nagasunod si Pia sa Hollywood actress nga si Anne Hathaway nga nagapang-lima ($2.98-million), samtang nagapanguna naman si Hyunjin sang Stray Kids ($4.02M).
Sang nagligad nga tuig, sanday Pia, Heart Evangelista kag Liza Soberano ang nalakip sa ginpahayag man nga may high media impact value sa Milan Fashion Week.
Sang 2023, una na ginsapubliko sang bana ni Pia nga si Jeremy Jauncey nga wala naghaum ang beauty queen nga makatambong pa ini sa fashion weeks bangud tatlo ka tuig man ini nga nabudlayan nga makasulod sa European fashion scene.#
