Nagpangayo sang pasaylo si Miss Universe 2015 Pia Wurtzbach matapos nakit-an sa video nga nagpatunga ang iya nga security personnel kag daw kaangay nga wala naghatag sang pagtahod apisar nga nagpangamusta ang beauty queen sa National Artist for Film and Broadcast nga si Ricky Lee.
Natabo ang insidente sa Manila International Book Fair sang nagligad nga Septyembre 14.
Sa amo nga video, ginapalibutan sang mga guwardya si Pia samtang nga nagalakat ini. Sang nakita sang beauty queen ang respetado nga national artist, ginpangamusta niya ini apang makadali lamang bangud naglabay man ang security personnel sa tunga nila kag daw kaangay nga ginapunggan ang malip-ot nga interaskyon sang duha.
Ginpahayag nga nag-reach out mismo si Pia sa national artist kag nag-sorry sa natabo.
Sa bahin sang award-winning writer, ginsiling sini nga wala man niya nanotisyaran ang natabo sang amo nga tion, apang nasapakan lang ini sang ginpakita na sa iya ang video kag ang mga komento sang mga tawo.
“I think medyo naging rude ‘yung guwardiya. Again, ulitin ko, hindi dahil senior citizen, hindi dahil National Artist. I think maski na sinong tao, maski na bata o estudyante, kung in-acknowledge ni Pia, kinausap at pinasalamatan, huwag niyang itaboy. ‘Yun ang punto ko,” pahayag ni Lee.
Pahayag sini, kuntani mangin leksyon na ang natabo nga mangin mas considerate ang iban nga tawo sa isa kag isa.
Ginhingadlan si Lee nga National Artist of the Philippines for Film and Broadcasting Arts sang nagligad nga tuig. Siya ang author sang “Para Kay B,” “Si Amapola sa 65 na Kabanata,” kag iban pa nga mga libro.
Yara naman si Pia sa amo nga book fair agud nga mag-promote sang iya labing-una nga nobela nga “Queen of the Universe: A Novel: Love, Truth, Beauty.” #
