Nagsabat si Miss Universe 2015 Pia Wurtzbach sa masakit nga direct message nga iya nabaton halin sa isa ka netizen nga naga-wish nga bulagan siya sang iya bana kag mangin isa siya ka single mother.
Gin-screenshot ni Pia ang mensahe kun sa diin mabasahan ang message sang netizen nga naga-akusar kay Pia nga indi maka-afford sang unique design sang luxury brand nga Hermes.
Nagsiling man ini nga nagalaum siya nga mangin divorced si Pia sa iya bana nga si Jeremy Jauncey, pero hirit pa sini, mas maayo kun magbusong anay si Pia para nga isa ini ka single mother.
“Praying for your divorce soon. Soon he will realize you are a user and can’t bring anything in the table. Pero mas maganda if pregnant ka muna so you’ll be divorced single mom. Manifesting,” kabahin sang DM.
Pahayag sang beauty queen, makakalapoy man kag masakit ini nga mensahe nga iya mabaton.
Nagpanawagan man ini sa followers nga indi pag-i-normalize ang mga amo sini nga batasan sa social media. Gin-engganyo man sini ang iban nga magbag-o na bangud bag-ong tuig na.
“Just another day, another DM. Wild, right?” sabat sang beauty queen. “C’mon people. Bagong taon na. Nag [Chinese New Year] pa,” she said, adding, “It’s exhausting, and hurtful din ha. Let’s stop normalizing this kind of online behavior. Out na natin ‘yung ganito for 2025 and instead, let’s be nice to each other and support and uplift one another.”
Sang nagligad nga bulan, gin-anunsyo ni Pia nga indi ini magkadto sa Paris Fashion Week nga ginpatigayon sang Enero 27-30.
Sang 2024, nangin produktibo ang tuig para sa model-influencer bangud nalakip ini sa nakit-an sa runways kag sa prestihiyoso nga fashion shows kaangay sa Milan, Paris kag New York.
Nagpang-18 siya sa listahan sang most visible fashion influencers of the year matapos nakapagkit sang $38.4 million sa earned media value (EMV) kag 1.1 percent average engagement rate. Nakalinya ang iya pangalan sa international celebrities kaangay kanday Jisoo kag Rosé sang Blackpink, Kim Kardashian, Cha Eun-woo kag Kendall Jenner.
Sang amo man nga tuig, siya ang ginhingadlan nga top influencer sang Milan Fashion Week Spring/Summer 2025 womenswear edition.
Nakabaton man siya anay sang Global Fashion Influencer of the Year award sa Dubai.
