Ginpanginwala ni Public Information and Community Affairs Office (PICAO) head Jose Nereo Lujan ang mga akusasyon sang Liga ng mga Barangay-Iloilo City Chapter nga ang iya mga Facebook post nagapakita sang “bitter hostility” batuk sa Iloilo City Government kag kay Mayor Raisa Treñas.
Sa sulat nga ginpadala kay Iloilo Governor Arthur Defensor Jr., ginlaragway ni Liga President Maria Irene Ong kag sang mga district president ang mga komentaryo ni Lujan bilang “vile, malicious and below the belt character assassination”.
Bangud sini, ginpangabay sang mga city officials sa gobernador nga hatagan ini sang nagakaigo nga tikang.
Ginkwestyon naman ni Lujan ang mga akusasyon, nga nagasiling nga wala ginpatpat sa sulat ang specific nga mga post nga nagasuporta sa mga alegasyon.
Ginpabutyag niya nga ang pagpakamalaot sa mga opisyal sang gobyerno indi dapat gilayon pagkabigon nga kaaway ukon sala nga pamatasan.
Ginpahayag man niya nga ang iya personal nga mga opinyon sa Facebook indi dapat gilayon nga i-angot sa Iloilo Provincial Government.
Dugang pa, ginhangkat ni Lujan ang mga opisyal sang Liga ng mga Barangay-Iloilo City nga ipakita ang mga post nga ila ginakwestyon agud makita kag mahusgaran sang publiko.
