Nagbungguanay ang isa ka pick-up kag Ceres bus nga nagresulta sa pagkawasak sang bumper sang duha ka salakyan sa dalanon sang Barangay Alcaygan, Banate, Iloilo, hapon sang Oktubre 13, 2026.
Sa interview sang Bombo Radyo kay Plt. Ma. Cherry Demarana, hepe sang Banate Municipal Police Station, iya ginpahayag nga nakapiyong ang driver sang pick-up rasun sa pagbunggo sa Ceres bus.
Ini nga pick-up ginamaneho sang 75-anyos nga si Rogelio, residente sang Banate, kag may sakay ini nga duha ka pasahero sang nagluntad ang aksidente.
Samtang, ang Ceres bus padulong sa Iloilo City agud magdul-ong sang mga pasahero sang nadalahig ini sa aksidente.
Dugang pa, wala man sang may napilasan sa sakay sang pick up apang gindala ang driver sini sa ospital para hatagan sang nagakaigo nga pagbulong.
Samtang, wala man sang napilasan sa mga pasahero nga sakay sang Ceres bus.
Text by: Bombo Jay Panizales
