STA. BARBARA, ILOILO – Padayon pa nga ginapadalman sang mga otoridad ang motibo sa pagpangluthang sa pick-up sa diin sakay ang duha ka empleyado sang 4th Engineering District sang Department of Public Works and Highways (DPWH) sa Santa Barbara, Iloilo.
Sakay sang pick- up si Rogelio Cirilo nga amo ang driver kag si Engr. Eva Bedonia nga amo ang pinuno sang Quality and Assurance section sang 4th Engineering District sang DPWH.
Sa interview sang Bombo Radyo kay Police Major Raymond Celoso, hepe sang Sta. Barbara Municipal Police Station, lima ang igo sang bala sa passengers side sang pick up.
Suno kay Celoso, natabo ang pagpangluthang 30 metros ang kalayuon sa opisina sang DPWH.
Nakaluwas naman ang mga sakay sang pick up.
Gilayon naman nga nagpalagyo padulong sa Cabatuan, Iloilo ang mga suspek nga sakay sang motorsiklo.
