ILOILO CITY-Natapos na ang masadya nga mga inadlaw sang empleyado sang isa ka commercial establishment sa Fuentes St., Iloilo City Proper matapos nga nadiskubre ang iya modus kag nadakpan ini sa akto nga pagpalasik sang kinarton nga mga produkto.
Ang suspek amo si Lester Rubido, 26, residente sang Barangay Veterans Village, Iloilo City Proper kag driver sang delivery truck kag nagabulig man sa paghakot sang ila mga produkto sa bodega.
Sa interview sang Bombo Radyo kay Police Captain Jobert Amado, hepe sang Iloilo City Police Station 7, iya ginpahayag nga mismo ang tag-iya sang iya gina-ubrahan nga warehouse ang nakakita kay Rubido kag natingal ini kun ngaa yara sa sulod sang bodega ang suspek apisar sirado na ini.
Suno kay Amado, base sa ila imbestigasyon kag sa pag-ako man ni Rubido, sa tion nga magsirado na ang warehouse, nagapabilin ini sa sulod agud magpanago kag ginakarga ang kinarton nga grocery items sa delivery truck.
Pahayag ni Amado, ginadul-ong ni Rubido ini nga mga items sa Muelle Loney, Iloilo City Proper kun sa diin ini ginabaydan sang indi magnubo sa P30,000 sa kapin 30 ka karton sang mga produkto nga iya ginapalasik.
Nagagwa man nga salaligan gid sang tag-iya sang warehouse si Rubido bangud diri ini nagpatigayon sang summer job sang 2015, kag sang 2016-2018 nag-obra na ini sang regular, apang naghalin sang 2019 kag nagbalik sang 2021.
Bangud madugay na nga ginahimo ni Rubido ang modus, ginabanta nga minilyon ka pesos naman ang balor sang iya kinawatan.
Preso na ini subong sa Police Station 7 kag nagapangatubang sang kaso nga attempted qualified theft.
