IRAN — Ginkasubo sang pila ka mga world leaders ang pagtaliwan ni Iranian President Ebrahim Raisi matapos nga nag-crash ang ginasakyan sini nga helicopter sa kabukiran malapit sa Azerbaijan border.
Sa ginpaguwa nga statement ni United Arab Emirates President Sheikh Mohamed bin Zayed Al Nahyan sa X ukon Twitter, ginapalab-ot sini ang iya pagpakig-unong sa Iranian government kag sa mga residente sang Iran sa pagtaliwan sang ila presidente.
Ginakabig man sini nga isa ka dako nga trahedya sa pungsod sang Iran ang natabo nga insidente kag ginapangamuyo sini sa mahal nga makaako ang pagpahuway ni Raisi.
Nagpabutyag naman sang pagkasubo ang hari sang Quatar nga si Tamim bin Hamad Al Thani sa pamilya ni Raisi kag sa mga opisyal sang Iran.
Ginkakibot naman ni Indian Prime Minister Narendra Modi ang natabo nga insidente sa presidente sang Iran, sa diin nagpalab-ot man ini sang sinsero nga pagkasubo sa natabo nga trahedya.
Nagpakita naman sang suporta sa mga Iranian nationals si Iraq Prime Minister Mohamed Shia al-Sudani kasunod man sang natabo, sa diin ginakasubo man sang ila gobyerno ang makakilibot nga trahedya.
Ginpalab-ot man sini ang iya simpatiya sa mga opisyal sang Islamic Republic kag nagakaisa sa kasubo sang ila ginakabig mga utod nga Iranian national.
Nahibaluan nga sa tatlo ka helicopters sang Iran, ang helicopter lamang nga ginasakyan ni Iranian President Ebrahim Raisi kaupod si Foreign Minister Hossein Amir Abdullahian kag pila ka mga opisyal sang Iranian government amo ang nagtibusok samtang ang duha naman ang hilway nga nakahugpa.
Sa inisyal nga imbestigasyon sang otoridad, naghalin ang presidente sa inauguration ceremony sang Qiz-Qalaisi Dam, sa diin, 30 minutos matapos nga naghalin ang helicopter sa lugar, nagtibusok ini bangud sa madamol nga fog.
Si Raisi ang naga-edad 63-anyos, naghalin sa isa ka rehilyoso nga pamilya, ginakabig nga Iran’s top judge antes nangin ika-walo nga presidente sang Iran matapos ini nga nagdaog sang 2021 elections.
