𝗜𝗟𝗢𝗜𝗟𝗢 𝗖𝗜𝗧𝗬— Ginalantaw sang pila ka mga abyan sang isa ka anay punong barangay nga gintiro-patay sa Brgy. Baldoza, Lapaz, Iloilo City nga posible ang pagpamalabag sini sa factory sang feed mill sa ila lugar ang rason sang iya kamatayon.
Ang biktima amo si Ernie Poral, 65-anyos, residente sang Brgy. Ingore, Lapaz, Iloilo City.
Sa interview sang Bombo Radyo kay Antonio Jaleco, anay punong barangay sang Brgy. Baldoza, Lapaz, Iloilo City, iya ginpahayag nga isa si Poral sa nagkwestyon sa pagpatukod sang proyekto nga feed mill sa ila lugar.
Suno kay Jaleco, nagserbe si Poral nga tigpamaba sang mga residente kon may mga reklamo nga kinahanglan i- address ukon solbaron.
Ginpahayag man sini nga may petisyon siya nga ginpalibot para pirmahan sang mga residente agud mapauntat ang proyekto nga feed mill.
Ginkilala man sang natungdan si Poral nga may prinsipyo kag panindugan para sa iya nga mga pumuloyo nga nasakopan.
Nahibaluan nga nagpahimo sang resolusyon sa ila barangay ang biktima kaangot sa public disturbance bangud sa ginapahayag huol nga ginatuga sang feed mill sa pila ka mga residente.
Sa pihak sini, gin-athag ni Jaleco nga ang ini nga motibo ang indi pa pinal bangud wala man siya sang ihibalo sang matuod-tuod nga motibo sa likod sang kamatayon ni Poral kag ginalatag lamang niya ang mga natabo antes nga gintiro-patay ang biktima.
