MANILA – Nagsentro sa pagbinuligay sa tion sang pandemya ang Turno en Contra speech ni Iloilo 1st District Rep. Janette Garin kadungan sang deliberasyon kun sa diin lusot na sa third and final reading sang Kamara ang P4.5 trillion nga 2021 national budget.
Sa iya speech, gin isa-isa ni Garin ang mga ahensya sang gobyerno nga nagakadapat nga tutukan kag hatagan sang mas mataas nga pondo kag lakip diri amo ang Office of the Ombudsman, Department of Social Welfare and Development kag ang Commission on Audit.
Gindayaw naman ni Garin ang Department of Agriculture, Department of Labor and Employment kag ang Inter-Agency Task Force samtang ginpasalamatan naman niya ang tanan nga frontliners.
Kadungan sini, ginkwestyon ni Garin kun nga-a madamo ang loan sang Pilipinas para sa COVID-19 response kag kun bala masarangan ini nga bayaran sa mas mataas nga interes.
Isa man sa ginplastar sang mamalidha amo ang ginapahayag unused appropriations sang Department of Public Works and Highways nga nagalab-ot sa P1.9 trillion nga kun tani, mahimo pa nga magamit sa COVID-19 response sa paghatag sang trabaho paagi sa Build, Build, Build program.
Sa isyu sang COVID-19 vaccine, namitlangan sang natungdan ang Public Attorneys Office nga ginapamunu-an ni PAO Chief Atty. Persida Acosta lakip na si PAO Forensic Chief Dr. Erwin Erfe.
May kaangtanan naman sa ginapahayag madata nga anomaliya, mas gintutukan ni Garin ang isyu sa Philippine Health Insurance Corporation (PhilHealth) kun sa diin iya ini nga gintawag nga “disgusting”.
