ILOILO CITY – Igasirado ang pila ka bahin sang City Proper Area agud hatagan sang ligwa ang Opening Salvo sang Dinagyang Festival 2020.
Santo pagsinapol sang Iloilo Festivals Foundation Inc., ginkasugtan nga ang Opening Salvo ang patigayunon sa Enero 10, Biyernes, kag maga-umpisa ang programa 1:30 sa hapon.
Isirado ang pila ka bahin sang City Proper area ilabi na sa Calle Real umpisa 1:00 sa hapon apang may yara sang car pass nga igahatag para sa mga tribe members nga magapakigbahin sa Opening Salvo.
Sa Part 1, pangunahan ni Iloilo City Mayor Jerry Treñas ang programa kag pagasundan sang pagpasundayag sang anum ka barangay tribes para sa Dagyang sa Calle Real.
Sa Part 2, may parada ang mga kandidata nga magapasakop sa Miss Iloilo 2020 kag pagasundan sang pagpasundayag sang school-based tribes nga magapakigbahin sa Dinagyang 360 performance.
Nauna na nga ginpahayag sang Iloilo Festivals Foundation Inc. nga madamu sang bag-o nga dapat saksihan sa pagpatigayon sang Dinagyang Festival 2020.
