Nagapabilin nga wala pa nakapasa sang accomplishment report sa Iloilo Provincial Veterinary Office ang pila ka mga banwa sa Iloilo may kaangtanan sa pagpangbakuna sa mga ido.
Ini amo ang banwa sang Igbaras, Leganes, Miag-ao, San Enrique, kag San Dionisio.
Sa interview sang Bombo Radyo kay Dr. Darel Tabuada, Veterinarian sa Iloilo Provincial Veterinary Office, iya ginpahayag nga yara na 29.71% sang mga ido sa probinsya ang nabakunahan.
Sa nasambit nga porsyento, nakasaad diri nga sa kabug-usan nga 367,907 ka mga ido, yara sa 109,310 ang nabakunahan na.
Suno kay Tabuada, tubtob sa Abril 30, 2025 na lang ang mass dog vaccination sang Provincial Government.
Target man sang lokal nga panguluhan nga malab-ot ang 70% sang dog population sa probinsya ang mabakunahan.
Sa subong, ang mga banwa sang Banate, New Lucena, Cabatuan, Concepcion, kag Tubungan pa lang ang nakalab-ot sang 70-porsyento nga nabakunahan nga mga ido.
