ILOILO CITY – Nagapangatubang sang duha ka kriminal complaints kag isa ka administrative complaint ang pila ka barangay officials sang Tanza Tinawa Zone 1, Iloilo City may kaangtanan sa ginapahayag anomaliya sa Social Amelioration Program.
Sa interview sang Bombo Radyo kay Police Lt. Col. Gervacio Balmaceda, pinuno sang Criminal Investigation and Detection Group Region 6, iya ginpahayag nga may duha ka complainant nga nagpalab-ot sang reklamo batok kanday Punong Barangay Reynaldo Lorenzo, Barangay Kagawad Marlon Ledesma, Brgy. Kagawad Oliva Ollano kag Brgy. Sec. Ma. Lonie Robles.
Suno kay Balmaceda, ginpahayag sang mga tagreklamo nga may yara sang anomaliya sa listahanay sang mangin benepisyaryo sang P6,000 nga cash assistance.
Ginpahayag ni Balmaceda nga magkatuhay nga ginpasaka ang kaso kriminal kag kaso administratibo batok sa nasambit nga mga barangay officials.
Sa pagpaathag naman ni Punong Barangay Lorenzo, indi matuod nga may anomaliya sa listahanay sang benepisyaryo kag matinlo ang iya konsensiya.
Suno kay Lorenzo, may yara na siya sang ideya kun sanday sin-o ang nagpasaka sang reklamo.
Apisar sang ginapangatubang nga kaso, ginpanindugan sang Punong Barangay nga ang Department of Social Welfare and Development ang nag-validate sang listahan.
