Ginpahayag ni Interior Secretary Juanito Victor “Jonvic” Remulla nga ginapatihan may plano ang pila ka bayolente nga pamatan-on nga sunugon ang Malacañang, matapos nga ginsindihan nila ang isa ka barricade truck kag ginpanghaboy sang bato ang mga kapulisan.
Suno kay Remulla, kalabanan sa mga nadakpan amo ang mga menor de edad kag ginapatihan nga miyembro sang isa ka street gang.
Sa pihak sang kinagamo kag kadamge nga ila nga natuga, ginpasiguro sang tiglikom nga ang mga na-aresto ipaidalom sa kustodiya sang Department of Social Welfare and Development (DSWD) para sa imbestigasyon kag pagproseso sang nagakaigo nga mga tikang.
Sa ginpatigayon nga protesta kahapon, gin-atake sang mga naka-maskara nga grupo ang mga kapulisan sa Ayala Bridge.
Ginsunog nila ang isa ka shipping van nga ginagamit bilang barikada malapit sa mga gate sang Palasyo.
Ginpanghaboy man sang grupo ang mga pulis sang bato, botelya, kag iban pa nga matig-a nga bagay.
Naglapta ang kinagamo tubtob sa Mendiola Bridge, rason nga napilitan ang kapulisan nga maggamit sang water cannon agud mapugngan ang grupo nga nagapangkakas sang security lines.
Indi magnubo sa 26 ka mga pulis ang napilasan sa amo nga insidente, samtang may pila man ka miyembro sang media nga nadalahig sa kinagamo.
Ginpahayag ni Remulla nga samtang ginakilala sang administrasyon ang katungdanan sang katawhan nga magpabutyag sang ila mga sentiment, responsabilidad man niya bilang hepe sang DILG nga siguruhon ang seguridad sang Palasyo.
Dugang niya, ginatutukan man sang Presidente ang mga nagakatabo nga protesta, ilabi na ang mga may kaangtanan sa isyu sang anti-korapsyon sa bug-os nga pungsod.
