ILOILO CITY- Nagpabutyag sang pagkadismaya ang pila ka mga opisyal sang Syudad sang Iloilo matapos nga wala ang mga ini gin-abiabi sa Dinagyang Festival 2020 highlights program kag sa awarding ceremony.
Ini amo sanday Councilors Lyndon Acap,Ely Estante kag Vice Mayor Jeffrey Ganzon.
Sa interview sang Bombo Radyo kay Konsehal Ely Estante, iya ginpahayag nga nagakadapat nga ang -hire nga mga emcee sang mga aktibidad sang syudad ang nakakilala sa mga opisyal para nga maabi-abi man ang ila mga presensya.
Suno kay Estante, apisar sila pa ang nag award sang mga minor awards kaupod ni Councilor Love Baronda kag Councilor Leila Luntao sa awarding ceremony, wala gid ginlawag ang ila nga pangalan.
Suno naman kay Vice Mayor Jeffrey Ganzon, protocol na sa mga programa ang pag-abi-abi sa mga opisyal nga nagatambong.
Samtang nangayo naman sang pasaylo si Councilor Jay Treñas sa ngalan sang mga emcee kag Iloilo Festivals Foundation Incorporated bangud sa kapaslawan nga abi-abihon ang mga opisyal sang syudad.
Suno sa iya,agud indi na masulit pa ang kaangay nga hitabo, iya iga-suhestiyon sa foundation nga magdesignar sang protocol officer sa kada programa agud maghambal sa mga emcee sa mga abi-abihon nga bisita kag opisyal.
