Gintupok sang kalayo ang pila ka parte sang Alimodian National Comprehensive High School sa Brgy. Poblacion, Alimodian, Iloilo.
Sa interview sang Bombo Radyo kay Romar C. Cubin, Principal III sang nasambitan nga eskwelahan, iya ginpahayag nga pasado ‘las 3 sang kaagahon sang nagsugod ang sunog sa hulot malapit sa quadrangle, lakip sa sunog ang ginabulubanta 4 tubtob lima ka classrooms, 2 ka opisina, School Clinic, School Canteen, Stock Rooms nga may mga instruments kag costumes sang mga estudyante.
Nagresponde naman sa amo nga sunog ang firetrucks sang Alimodian Bureau of Fire Protection kun sa diin, sa duha isa diri ang serviceable, lakip man sa nagbulig ang firetruck sang Pavia, Oton, Sta. Barbara, kag San Miguel.
Samtang, ginakabig naman ni Alimodian Mayor Ian Kenneth Alfeche nga isa ka masubo nga hitabo ang nagluntad nga sunog sa eskwelahan.
Suno kay Alfeche, apektado sa insidente ang mga estudyante nga nawad-an sang hulot-klasehan ilabi na nga magabukas na ang klase sa Hunyo 16, 2025.
Handa naman ang lokal nga panguluhan sang banwa nga magtanyag sang bulig para sa temporaryo nga hulot nga mahimo klasehan sang mga estudyante.
Gituad man sang alkalde nga ang pila ka mga classroom nga wala ginagamit sa klase ang nagaserbi nga stock room para sa equipment ukon musical instruments sang banda ukon Rondalia.
Lakip man sa nasunog ang mga costumes sang mga estudyante nga ginabanta masobra P500,000 ang balor.
Sa pangkabug-usan, ginabanta indi magnubo sa P14 million ang balor sang kahalitan sang sunog suno sa Alimodian PNP.
Nahibaluan nga antes pa man nasunog ang mga hulot, may nakatalana na nga ipatukod nga bag-o nga mga school buildings sa lugar.
May naman yara sang 1,638 ka mga estudyante ang naga-eskwela sa amo nga buluthuan sa School Year 2024-2025
Padayon naman nga ginasekyar sang katapo sang Bureau of Fire Protection ang eskwelahan agud matul-id ang rason sang sunog.
