ILOILO CITY – Mahimo nga magadamu pa ang mga departamento sa Iloilo City Hall nga may yara sang bag-o nga pinuno ukon Officer-In-Charge.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakadepende pa sa iya nga pagpangusisa kun bala ano pa nga mga departamento ang nagakinahanglan sang pagbag-o.
Ginpahayag ni Treñas nga sa subong, iya nga temporaryo nga gin-appoint bilang Officer-in-Charge si Engr. Noel Hechanova sa City Zoning Administration, Lianie Opinion sa Office of the Building Official, Engr. Salvador Pedregosa sa City Engineer’s Office kag Cherry Jover-Ampig sa Local Civil Registrar.
May kaangtanan naman sa pagpangakig ni Treñas sa flag raising ceremony kaina, iya ginpahayag nga naakig siya bangud sa pagkauyaya sang pila ka mga empleyado sa Iloilo City Hall.
Ginhalimbawa sang alkalde ang sa City Zoning Administratrion sa diin ang duta sa coastal road area sa diin nahamtang ang mga warehouse ang wala pa ma-convert bilang industrial/commercial.
Ginpahayag ni Treñas nga madamu sang mga warehouse nga yara sa coastal area ang wala pa sang building, business kag occupancy permit.
May yara man sang impormasyon ang alkalde tuhoy sa indi patas nga pagproseso sang permit.
Magluwas sa City Zoning Administration, may yara man sang natukiban nga kabulastugan ang alkalde sa Local Civil Registrar.
