ILOILO CITY – Ginkaakig sang pila ka grupo sang mga employers sa Kuwait ang desisyon sang Pilipinas nga magpatuman sang deployment ban sa overseas Filipino workers nga luyag magtrabaho sa nasambit nga pungsod.
Ginpahayag ni Bombo Radyo international correspondent Liberty Vertudes sang Bacolod City nga karon 15 ka tuig na nga nagatrabaho sa Kuwait, may isa ka grupo sang mga employers nga nagdesisyon nga indi na pag-renew ang kontrata sang mga Filipino workers apisar nga pila sa mga ini ang luyag pa magtinir sa amo nga pungsod.
Apang may yara suno kay Vertudes nga mismo ang mga eployers ang nagapugong sa mga Pinoy workers nga magpauli sa Pilipinas apisar nga luyag sang mga OFW nga magpauli kasunod sang deployment ban.
Kalabanan sang mga employers sa Kuwait ang indi na luyag magkuha sang iban nga lahi bangud gusto lang ang mga Pinoy.
Kasunod sang pagpaguwa sang deployment ban, gin-untat naman sang Philippine Embassy sa Kuwait ang pagpanagtag sang Overseas Employment Certificate (OES).
Apela naman sang mga Kuwaiti employers sa gobyerno sang Pilipinas nga paminsaron sang maayo ang himuon nga tikang bangud may mga amo naman nga mabuot.
May pila ka mga amo naman nga nagapati nga maghagan-hagan ang tensyon sa tunga sang Kuwait kag Pilipinas kag bawion ang deployment ban.