Nagpasugot ang pila ka food manufacturers nga magpatuman sang price freeze tubtub sa duha ka bulan.
Ginkumpirma ini ni President Ferdinand Marcos Jr. subong nga adlaw, Marso 20, kasunod sang koordinasyon sa industry players.
Kadungan ini sang iya pagbisita sa pasilidad sang Century Pacific Food Inc. sa Calamba, Laguna kun sa diin gin-check sini ang food supply kag pricing conditions.
“Not only Century but various food processors and retailers as well, we have adequate stock,” suno kay Marcos.
Ang iya ginbisita amo ang isa sa pinakadaku nga branded food companies sa Pilipinas nga may mga produkto nga nagalakip sang canned tuna, sardinas, meat, dairy, kag plant-based alternatives.
Suno pa sa punong ehekutibo, nagapakig-angot ang gobyerno sa suppliers agud masigurado nga may bastante nga basic goods.
Suno naman kay Trade Secretary Cristina Roque, sa ginpatigayon nga mga inspeksyon sa groceries kag manufacturing plants, nakit-an nga makalawig pa sang isa ka bulan ang current food supply ilabi na ang basic necessities kag prime commodities nga yara sa idalom sang government monitoring.
Wala pa ang na-report suno sa tiglikom nga mga kaso sang hoarding ukon profiteering.#
