Apisar sang nakasugtan sang compliance team kag sang Association of Barangay Captains (ABC) nga barangay officials ang mamalay-balay agud mahatag ang ‘one per household’ nga quarantine pass sa mga residente sa syudad sang Iloilo, may mga barangay gihapon kun sa diin mismo ang pumuluyo ang nagapadulong sa barangay hall agud magkuha sini nga access pass.
Subong na, Hunyo 4, required ini nga quarantine pass agud nga makabakal sang basic necessities ang isa ka miyembro sang isa ka pamilya.
Sa interview sang Bombo Radyo kay Mr. Nestor Canong, pinuno sang compliance team, iya ginpahayag nga nagapakig-angot na siya subong sa mga punong barangay agud mahibaluan kun pila na ka mga residente ang nakakuha sang passes.
“Aton gid ini nga gina-coordinate sa Liga ng mga Barangay agud mahibaluan naton kun kamusta ang ila pagpanagtag sang quarantine passes agud mabal-an naton kun maimplementar naton sang sakto,” pahayag ni Canong.
Suno sa natungdan, indi naman ini bag-o nga scheme gani nga nagalaum ang city government nga maimplementar ini sang maayo sa barangay level.
Matandaan nga gin-require ang quarantine pass sang una nga mga binulan sang pandemya sa Iloilo City sang 2020– sang napaidalom pa ini sa enhanced community quarantine, pinakaistrikto nga quarantine status.
Nagpahayag si Canong nga ‘intindihon man’ nga may mga pumuluyo pa nga wala nakabaton sang quarantine passes.
