Aminado ang pila ka transport cooperatives sa siyudad sang Iloilo nga indi na nila mapadalagan ang 100% sang ila mga units bangod sa nagapadayon nga mga problema sa operasyon, lakip na ang nagataas nga presyo sang petrolyo kag gasto sa pagpaayo sang mga ila mga unit.
Sa interview sang Bombo Radyo kay Cherry Acebuche, chairwoman sang Metro Iloilo Transport Service Cooperative (MITSCOOP), iya ginpahayag nga may yara sila sang 18 ka units nga yara sa motor pool kag ginapaidalom sa repair.
Suno sa iya, isa sa mga ginakabalak-an sang kooperatiba amo ang nagapadayon nga pagbayad sang amortization sang ila mga modernized jeepney, nga wala pa matapos tubtob subong.
Pahayag pa niya, nagadugang pa nga kabug-aton sa ila galastusan amo ang pagsaka sang presyo sang gatong kag iban pa nga operational expenses.
Bangod sini, indi sila pabor sa proposal nga mag-arkila pa sang dugang nga modernized jeepney units kasunod sang proposal sang World Bank, bangod posible nga madugangan ang ila pinansyal nga obligasyon kag mabudlayan sila sa pagbayad sang amortization.
Ginpahayag pa niya nga mahimo man ini makaapekto sa mga driver nga nagasalig sa ila operasyon.
Ginpunto ni Acebuche nga mas maayo nga tutukan anay ang mga problema nga ginaatubang sang mga kooperatiba, ilabi na ang pagpaayo sang mga units kag ang nagataas nga gasto sa pagpadalagan sang ila mga salakyan, antes magdugang sang bag-o nga obligasyon.
Dugang pa niya, nagpanawagan man sila nga mahatagan sang pagtamod ang epekto sang nagataas nga presyo sang petrolyo sa transport sector.
