Nagapabilin nga matawhay ang sitwasyon sang pila ka mga lodging house sa siyudad sang Iloilo kadungan man sa selebrasyon sang Valentine’s Day subong nga tuig.
Sa interview sang Bombo Radyo kay Leo Cubita, supervisor sang DL Drive-in Hotel, iya ginpahayag nga ginalauman nga sa hapon tubtob kagab-ihon pa ang pag-abot sang mga guest agud nga makapahuway.
Suno kay Cubita, yara lamang sa P250 pesos tubtob P500 pesos sa sulod sang 3 ka oras ang ila pinakabarato nga rooms.
Samtang P1,050-P1,200 naman ang ila mga para sa overnight rooms.
Ginakabig man sini nga natural lang nga nagalab-ot sa 100 ka mga guests ang ila nga customers sa tion sang pre-Valentine’s Day tubtob subong.
Ginpasigurado man sini nga ginasekyar gid nila ang kada guest pinaagi sa pagcheck sang ID agud masiguro nga wala sang menor-de-edad nga makasulod.
