ILOILO CITY – Ginalauman na sang pila ka mga mamalidha ang desisyon ni Presidente Rodrigo Duterte nga magpabilin sa puwesto si Bureau of Customs Commissioner Nicanor Faeldon.
Sa interview sang Bombo Radyo Iloilo, ginpahayag ni House Committee on Dangerous Drugs chairman Surigao del Norte Rep. Robert Ace Barbers nga prerogative sang Presidente nga magpabilin si Faeldon sa Bureau of Customs.
Apang ginpanindugan sang mamalidha nga incompetent ang mga opisyal sang BoC kun basehan ang ginpatigayon nga hearing kahapon sang iya komite, may kaangtanan sa P6.4 billion nga shipment sang iligal nga droga nga nakalusot sa Customs nagikan sa China.
Suno kay Barbers, ginhungod sang Customs nga himuon nga palpak ang raid sa warehouse sa Valenzuela kun sa diin nakumpiska ang binulto nga shabu, agud mapiyerde ang gobyerno.
Pero hatagan gihapon sang Kongreso sang kahigayunan nga magpaathag ang mga opisyal sang Bureau of Customs.
Si Barbers upod ang pila pa ka mamalidha, ang nagpanawagan sa pag-resign ni Faeldon bilang Customs Commissioner.