ILOILO CITY – Wala sang ideya ang pila sa mga manunudlo sa Iloilo City may kaangtanan sa nagalapta nga learning material kun sa diin, gingamit ang litrato sang Cabugao Island sa Gigantes Island sa Carles, Iloilo kag ginlaragway nga amo ang Caramoan Islands sa Camarines Sur.
Ang ini nga learning material ang gingamit sa subject nga Araling Panlipunan sang Grade 3 pupils sa wala natumod nga eskwelahan.
Sa interview sang Bombo Radyo kay Miss Kristine Bugtong, Teacher 1 sa Iloilo Central Elementary School, iya ginpahayag nga sa ila bahin, wala sila nakagamit sang amo nga learning material.
Pahayag niya, mother tongue ang ila ginagamit sa ila learning materials nga lain sa kontrobersyal nga textbook nga naggamit sang lenggwahe nga Ingles.
Nahibaluan nga nag-ani sang negatibo nga komento ang Facebook post ni Divine Delfin Katibayan bangud nga nagasaad ini sang sala nga impormasyon.
Ang Caramoan Islands ang kilala nga tourist spot para sa island hopping, hiking, diving kag caving.
Samtang, ang Cabugao Island ang kabahin sang 10 ka mga isla sa Gigantes Island nga isa man sa kilala nga tourist destination sa probinsya sang Iloilo.
