ILOILO CITY – May mga banwa na sa probinsya sang Iloilo nga nagpabutyag sang interes sa pag-avail sang sentineling program sang Department of Agriculture.
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga nagahulat ang probinsya sang submission sang Municipal Agriculturist Office sang listahan sang nga barangay nga naka-qualify santu sa requirements nga ila ginpasa.
Apang suno kay Tabuada, ang banwa pa lang sang Sta. Barbara ang nakapasa kag i-validate ini sang Provincial Veterinary Office kag i-endorse sa Department of Agriculture.
Paathag ni Dr. Tabuada, ang local government unit amo ang naga-identify sang mga banwa para sa sentineling program apang ipaidalom ini sa gihapon sa verification sang Provincial Veterinary Office.
Ang tagsa ka hog raiser ang hatagan sang sentinel piglet agud nga sagudon sa diin iga-minitor ini para lantawon kun bala maapektuhan sang balatian ukon indi ang baboy.
Sang tinalikdan nga semana, gin-establish sang Provincial Veterinary Office, livestock technicians kag Department of Agriculture ang mga requirements.
Diri ginpaboran nga ang programa ang ipatuman sa barangay level agud mahapos nga i-monitor.
Lakip sa criteria amo ang mga masunod;
*dapat wala nakarekord sang African swine fever outbreak sa barangay makaligad ang 40 ka adlaw
*kun mahimo, dapat wala sang nabilin nga baboy sa barangay
*kun may nabilin nga baboy, gina-engganyo ang mga hog raiser nga ilakip ang mga ini sa sentineling program
*kag dapat nga in place sa gihapon ang biosecurity measures
Sa sulod sang 40 ka adlaw, regular nga i-monitor sang Provincial Veterinary Office, Department of Agriculture kag Municipal Agriculture Office ang sentinel piglet pinaagi sa pagkolekta sang blood samples agud nga i-test ini agud mahibaluan kun may yara sang infection.
Sa tion nga magguwa ang resulta sang test nga indi man infected ang baboy, hatagan ang farmer sang dugang nga duha ka mga sentinel piglets.
Tinutuyo sang nasambit nga programa nga hibaluon ang African swine fever-affected hog raisers nga maka-amat amat na balik sa pagsagod sang baboy.
