ILOILO CITY – Gin-ako sang pila ka mga barangay officials nga nakabaton sila sang social pension nagikan sa Department of Social Welfare and Development (DSWD) apisar nga indi man eligible.
Sa interview sang Bombo Radyo kay Punong Barangay Pepito Villegas sang Ma. Cristina, Jaro, Iloilo City, iya ginpahayag nga sang siya ang barangay kagawad pa lang sa ila nga barangay, nakabaton siya sang social pension sa makaduha ka beses.
Apang na untat ang iya nga pagbaton sang siya ang nagpungko na bilang punong barangay.
Handa man si Villegas nga ibalik ang kwarta nga iya nabaton bilang mandu man sang DSWD sa City Social Welfare and Development Office (CSWDO) nga i-require ang mga non-eligible nga i-refund ang social pension nga ila nakuha.
Sa syudad sang Iloilo, may yara sang 13,190 ka mga social pensioner sa diin 420 diri ang nalakip na non eligible.
Samtang suno naman kay Brgy Kagawad Manuel Gumito Jr. sang Cochero, Molo, Iloilo City, nakabaton siya sang social pension isa ka beses apang sang siya ang nagpungko na bilang brgy kagawad, ini na ang na untat.
Naghingyo naman si kagawad Gumito nga indi na lang kuntani pag ipa-refund sang DSWD ang iya nga nabaton bangud may yara pa siya sang ginabaydan nga tuition fee sang iya anak sa kolehiyo.
