𝗔𝗥𝗘𝗩𝗔𝗟𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Preparado na ang pila ka mga barangay sa Iloilo City nga yara sa idalum sang “High Risk” sa pagbaha subong nga tig-ululan.
Sa interview sang Bombo Radyo kay Punong Barangay Dianalin Minerva sang Brgy. Sto. Niño Norte, Arevalo, Iloilo City, iya ginpahayag nga nagapatuman na sila sang mga clean up drive sa palibot sang ila nga barangay agud nga matinlu-an ang mga drainage nga naga-clog.
Suno kay Minerva, isa man sa pagpanghangkat sa ila, amo ang mga drainage nga tuman gid kabudlay nga ma-declog rason nga ginpadulong nila sa Office of the Mayor agud nga matutokan.
Nagpasalig naman ang City Government nga magapadala sila sang mga kagamitan sa amo nga lugar agud nga mapadasig ang declogging.
Ginpahayag man sang natungdan nga indi gid malikawan nga sila ang mabaha bangud man sa nagapadayon nga pagsaka sang populasyon.
Ginalantaw man sang opisyal nga nangin rason man sang madasig nga pagsaka sang tubig amo ang pagtambak sang mga pumuluyo sang duta agud nga mapataas man ang ila nga puluy-an.
Ginaproblema naman sang mga residente sang Brgy. Calaparan, Arevalo, Iloilo City ang madugay nga pag-subside sang baha sa ila nga lugar ilabi na kun taob ang baybayon.
Sa interview sang Bombo Radyo kay Punong Barangay Renante Tubola, iya ginpahayag nga nagpatuman na sila sang advance declogging sa mga kanal agud nga indi na magsupon ang mga basura kun hinali nga magbubo ang mabaskog nga ulan.
Suno kay Tubola, ginapreprahan man nila ang pagpatuman sang clean up drive, ilabi na nga isa ang ila barangay sa may pinakamadamo nga dengue cases sa Iloilo City.
Ginpahayag man sang natungdan nga halos naubos na nila libot ang lugar sa pag- declog, sa diin, duha na lang ka porsyon sang ila barangay ang wala pa nalab-otan.
Dako naman nga pagpahangkat para sa ila nga bahin ang mga duta kag basura nga nagabara sa tagsa ka drainage.
