ILOILO CITY – Gin-athag ni Punong Barangay Roberto Niño sang Calumpang, Molo, Iloilo City nga indi total lockdown ang igapatuman sa lima ka mga barangay sa syudad sang Iloilo.
Ini matapos nga sa mensahe ni Mayor Jerry Treñas, kabahin sa ipaidalom sa selective lockdown epektibo 6:00 subong nga aga, Agosto 10, amo ang Airport sa Mandurriao, Calumpang sa Molo, Simon Ledesma sa Jaro, Rizal Estanzuela sa City Proper kag Guzman Jesena sa Mandurriao.
Sa interview sang Bombo Radyo kay Niño, iya ginpahayag nga ang buot-silingon sang selective lockdown amo nga may sitio ukon zona lamang sa isa ka barangay nga iga-lockdown ilabi na kun sa diin naga-istar ang COVID-19 positive.
Suno kay Niño, sa selective lockdown, ang mga residente nga naga-istar sa iban nga bahin sang barangay ang mahimo sa gihapon nga makaguwa indi kasubong sa total lockdown.
Sa bahin sang Brgy. Calumpang, ginpahayag sang natungdan nga kabug-usan nga lima na ka COVID-19 cases ang na record kun sa diin ang tatlo diri ang pinaka-ulihi nga nagdugang sa listahan.
May kaangtanan diri, naglab-ot sa 84 ka kaso sang Coronavirus Disease 2019 (COVID-19) ang na record sa syudad sang Iloilo.
Ang nasambit nga data ang na record humalin 11:40 pm (August 8) tubtub 2:45pm (August 9).
