Nagapanghakroy ang pila ka mga driver bangud indi makakuha sang ayuda halin sa gobyerno bangud wala sila sang pantawid pasada card.
Sa pantawid pasada card ginapasulod sang gobyerno ang ayuda sa mga drivers.
Sa interview sang Bombo Radyo kay Erning Estornino, driver sang jeep, iya ginpahayag nga kasunod sang paglain sang iya operator, wala na siya nakabaton sang ano man nga ayuda halin sa gobyerno bangud nabilin sa daan niya nga operator ang iya pasada card.
Suno kay Estornino, wala man siya nakakuha sang ayuda nga P7, 200 nga ayuda sang nagligad nga tuig bangud sang ginkadtuan sang iya operator sa Land Transportation Franchising and Regulatory Board (LTFRB), may yara na sang nag-claim apang wala nabutang kun sin-o.
Subong nga tuig, may ginpa-in nga P2.5B ang gobyerno para sa mga drivers nga naapektuhan sang padayon nga pagsaka sang presyo sang gatong.
Bangud wala sang pasada card si Estornino, indi man siya sa gihapon makabaton sang ayuda.
Nagapanawagan si Estornino sa gobyerno nga kun mahimo, indi nalang pag-ipaagi sa pasada card ang ayuda agud nga makabaton man ang tanan nga mga drivers.
