Wala sa gihapon nakabaton sang kompleto nga sweldo nagikan sa Land Transportation Franchising and Regulatory Board (LTFRB) ang pila ka mga driver sa idalom sang service contracting program sa syudad sang Iloilo.
Ini ang kasunod sang pagtakop na sang libre sakay program umpisa subong nga adlaw, Hunyo 30.
Nahibaluan nga may yara sang P5.58 billion budget ang Department of Transportation sa idalom sang Bayanihan 2 law nga matapos na subong nga adlaw.
Sa exclusive interview sang Bombo Radyo kay Mr. Rizalito Alido, Board Secretary sang Iloilo City Alliance of Operators and Drivers Transport Cooperative (ICAODTC), iya ginpahayag nga halos ginhapo man sila sang lagas sang ila mga balayran bangud tubtob subong, kulang ang ila ginabaton nga sweldo sa LTFRB.
Suno kay Alido, isa sa ginlantaw nila nga rason sang pagkadelay sang ila nga sweldo amo nga posible masako ang LTFRB bangud sa Region VI, halos 7,000 tanan ang aplikante kag mga driver sa idalom sang service contracting program.
Pahayag ni Alido, wala man nagasalanto ang record sang dalagan sang ila nga kilometro sa pagbyahe rason nga dako man ang posiblidad nga nadugayan man ang LTFRB sa pagproseso sang ila sweldo nagikan sa central office.
Gin-ako man ni Alido nga nagalaom sila nga may ara pa sang Bayanihan 3 law agud nga mabalik pa ang service contracting program.
Nahibaluan nga sa subong, sukton na ang mga pasahero sang regular nga plete.
