𝗜𝗟𝗢𝗜𝗟𝗢 𝗖𝗜𝗧𝗬 —Nagapati ang isa ka anay driver sang modernized jeepney nga indi makabuhi sa pamilya ang sweldo nga ginahatag sang isa ka transport cooperative ilabi na nga delay pa ini kon mag-abot.
Sa interview sang Bombo Radyo kay Alyas Arnel, anay driver sang modernized jeepney, iya ginpahayag nga apisar nga nagahatag ang kooperatiba sang cash advance, tuman ini sa gihapon ka kulang kon ang matag-adlaw-adlaw nga pagkaon lang ang gastohan.
Suno kay Arnel, sa duha ka mga kooperatiba nga iya ginsudlan, tanan ini ang puros palpak kon sa patag sang sweldohanay lamang ang istoryahan rason nga nagbalik ini sa pag-drive sang tradisyonal nga jeep.
Gin-ako man sini nga ang iya gina-drive subong nga jeep ang unconsolidated bangud nga kon consolidated, wala man sa gihapon sang makuha ang driver kag operators.
Ginpahayag man sang natungdan nga nagdesisyon na lang siya nga maghalin sa kooperatiba bangud sa palpak nga sistema.
Dako naman ang iya pagpasalamat sa mga pasahero kag komyuters nga nagapadayon sakay sa mga tradisyonal nga jeep, apisar sang madamo nga modernized jeepney ang nagataris sa dalan.
